Waggis si dass isch e Passion
e Figur us Baasel als Faszination
leegt s Goschtyym a und macht sich uff d Bai
Drey Daag bisch als Waggis aifach derbyy
du hoffsch dass goot nie verbyy
Als Waggis gosch go Lyt apaile
intrigiere, stopfe, wäärfe und vertaile

Mir sind Charivari-Waggis uff dr Gass
und mache an dere Fasnacht eych alli Nass
Dr Cortège faare mir mit unserem Waggiswaage
und derfe stolz di Zuugsblagette traage
Ziibele , Blueme und Räpplirääge
dien die Fasnacht wirgglig prääge
Mir schleen vor frait e Burzelbaum
denn das isch fyr uns e grosse Draum

Doch e grosses Ghaimniss duet uns beglaite
Mir kenne uns no so verklaide
Aigentligg waiss es e jede
Drum derfe mir do jetzt rede
Als Häxe kennt me uns sit mir Fasnacht mache
und drum blyybt me was me isch, es wär zum lache
Bissig, ironisch und no vyyl mee
So wyrsch du uns immer gsee

Als Häxe im Charivari
Mache mir an dr Fasnacht Larifari
Mir trotze jedere Gryyse
Kämpfe gege die stiffi Bryyse
S Comité wird uns hoffentligg erhöre
D Subvensione klar erhöhe
Trotz Kryyse laufe mir yber dr Bach
und drum wird das e rundi Sach