Mir seen nytt,
mir heere nytt,
mir saage nytt
Jetz isch doch dr Trump dr neuy Presi in dr USA
Dr Umschwung zum Obama fangt scho mit em Hoorschnitt aa
Mit billige Reede duet är gar nit spaare
verspricht de Ami dr fuffziger Joore Stil z faare
Und die ganzi Wält seet nytt, heert nytt und sait nytt

Z Basel sin d Wahle au wider verbiii
S blibt so wie es scho immer isch gsii
Au die Neue magsch nit see nit heere und nit yber si schwätze.

Was z Basel zumene richtige Velofahrer gheert
Under em Helm Stöpsel i de Ohre, dass der Verkehrslärm nit steert
E go-Pro Kamera uff em Helm oder besser no e Brille
Und mit ainere Hand noch Pokemon spille
So ain seet nytt, heert nyt aber rieft uss wenss duet dätsche

Z Therwil will dr Glai dr Lehrerin s Händli nit schyyttle
Die vermummti Illi vom Färnseh sesch z Luzärn kuum am blyyttle
Z Basel wirsch vo de Scientologe betrooge und bedrängt
Seht dr Walliser e Wolf do waiss är wo sini Flinte hänggt
Und kaine waiss wie das goot
Aber am Morge isch das Wölfli tot
Si seen nytt, heere nytt und saage nytt

Und hesch gnueg gspaart und hesch Ferie gnoo
Denne frogsch di wo ana du wettisch goo
In dr Disco wirsch abegschosse wie z Paris
D Türkei vom Erdogan isch repressiv und mies
Im färne Oschte wirsch entfüert und hoggsch imene Verliess
Drum blibb in dr Schwitz do kaa dir nytt passiere
Duesch högschtens dini Finanze total ruiniere
Und denne seesch halt nytt, heersch nytt und hesch nytt z verzelle


d Häxe