20 Joor D Häxe
Mir sind scho undrwägs gsi: Do het dr Clinton sini Praktikantin Lewinski vernuudled
Uss em Radio hett Modern Talking dr ganzi Daag duudled

Mir sind scho undrwägs gsi: Do het die ganzi Wält wäg dem Millenium Bug gspunne
Und d Franzose hänn d Fuessball WM zum erste Mol gwunne

Mir sind scho undrwägs gsi: Do hän Spinner z New York zwai Wolggekrazer zersteert
Und vo der Swissair het me bald nytt me gheert

Mir sind scho undrwägs gsi: Do het me in Europa ganz ney mit Euro agfange zaale
Und dr Simmi Amman het kenne ab zwai Goldmedallie straale

Mir sind scho undrwägs gsi: Wo dr Busch aafot kriegerle im Irak dä Halbveruggt
Und dr Blocher d Metzlere uss em Bundesrot uusedruggt

Mir sind scho undrwägs gsi: Do isch der Ratzinger Papscht und d Merkel ganz oobe
Und d Vogelgrippe hett me uff speeter verschoobe.

Mir sind scho undrwägs gsi: Wo dr Federer zum erste Mol uf de Tennisthron gstiige isch
und dr Zidane anere WM nach eme Köpfler vom Platz gflooge isch

Mir sind scho undrwägs gsi: Do hän d Amis dr Obama als Präsident nomniert
Und d SVP het d Widmere zur Partei uusebugsiert.

Mir sind scho undrwägs gsi: Do isch die Bohrinsel im Golf vo Mexiko abebrennt
Und dr Merz vergäbe bim Gaddafi wäg dene Gaisle aagrennt

Mir sind scho undrwägs gsi: Wo d Nicola Spirig z London Olympiasigerin worde isch
Und dr Hildebrand vor Nationalbank ab isch, was hesch was gisch

Mir sind scho undrwägs gsi: Wo Papst Beni z Rom het abdankt und dr Franziskus isch koo
dr Edward Snowden het sini Spionagegschichtli usegloo

Mir sind scho undrwägs gsi: Wo d Schwobe d Fuessball WM hole und dr Putin d Krim duet poschte
Und IS wüetet wie e Furie im Nahe Oschte

Mir sind scho undrwägs gsi: Wo Frau Merkel ′wir schaffen das′ uuseloot
Und dr VW wäg dene Diesel ganz im Rääge stoot

Mir sind scho undrwägs gsi: Do hett England beschlosse uss dr EU z verschwinde
Und dr Erdogan fäggt mit isigem Bäse bis in letschte Egge hinde

Mir sind scho undrwägs gsi: Wo dr Trump und dr Kim Yong Un hän agfange Ragete z zelle
Und dr Wainstai alli Filmstärnli het meh als verschmuse welle

Au die nägschte Joor sind mir underwägs
Das gheert sich so fyr e rächti Häx.
d Häxe