Vom Garfield wais mes ganz genau
Är frisst gärn Lasagne und Pizza au
Was me niemols darf vergässe
Die Glaine wärden vo de Grosse gfrässe
Und wenn zwai Grossi zämeträffe
Denn gits e Schlacht und ain wird gfrässe
Drum sin mir gspannt, wies bi de Amis goot
Dr Trump als Presi und dr Musk als ghaime Root
Do muesch kai Hellseher sii, do muesch nit liege
Über Kurz oder lang wärde d Fätze fliege
Momentan mecht dr Trump jo Panama frässe
Und uf Grönland isch är au versässe
do sait är ohni Umetrugge
Kanada kennte mir Ami au no schlugge
Me muess gar nit bis zu de Amis goo
So Frässereie gitts au doo
Dr Migro hett dr Globus gfrässe, s isch veruggt
Drno hett är die Lääde eme Östricher anegspuggt
An dene Lääde het au dä sich überfrässe
Jetzte derf är im Gfängniss Pritsche mässe
e Thai frisst alles, hört me saage
dä hebi no dr grösser Maage
und au bi de Bangge lauft das Spiil, darfsch nit vergässe
Der Raiffaise Vincenz hett zvil gnoo und isch e Wili gsässe
CS Manager hän die Bangg vo inne gfrässe
Dr schäbig Räscht, wo no isch gsii
Kauft d UBS mit Gäld vor Portokasse ii
Im Alltag kasches au no see
Für de Uffstig duet e Jede alles gee
Drum will är au vom Schef, dr Poschte
Und wenns däm au dr Kopf duet koschte
Me sägt am Stuel vom Schef so hett me friener gsait
Wäg all däm Englisch got e Usdrugg in Vergässeheit
Modärn duet me däm jetz Mobbing saage
S isch aber s gliche wie in frienere Daage
Dä wo das kaa, das Lischt- und Ränggespiil
Dä kunnt friner oder spöter au ans Ziil
Drum ischs klar und me isch verschrogge
Dass obe vilmols grossi Duuble hogge
Dr Mensch vo hytt ka nimm ermässe
Was är an jedem Daag sell ässe
Drum frogt är bi so Foodentwiggler noo
Was denne setti uf de Spiisplan koo
Dä wird denn dir dr Rootschlaag gää
Alles was gärn hesch, darfsch nimme nää
Kai Salz, kai Fett, kai Zucker und kai Brot
E rohe Härdöpfel und Quinoawurtzle fyr d Not
Pommes und e saftigs Steak
Mit eme Glesli Wii isch fasch scho e Sakrileg
E Brotwurscht mit Röschti kasch glatt vergässe
Ghaggets mit Hörnli sett me au nimmi ässe
E grosse Umwääg sellsch bi Schoggi und Pizza mache
Loss Guetzli ligge, au wenn si di aalache
Do froggsch di denne goppeletti
Ob me wirgglig so gsund stärbe wetti
Mir aber hänn beschlosse
Au in Zuekunft wird das Lääbe gnosse
So ohni Gaumefreude lääbe
Das isch doch ganz dernääbe
Drum griffe mir ganz unscheniert
Zu Kueche und Süessem, am Beschte garniert
Und notürligg, das hämmer vom Garfield glehrt
Dass do derzue e Lasagne gheert.
